Initially you have to have your initials because….

ನಮ್ಮೆಲ್ಲರ identity ಇರುವುದು, ಮುಂದುವರೆಯುವುದು ನಮ್ಮ ಹೆಸರಿನೊಂದಿಗೆ. ಹೆಸರೇ ಅಲ್ಲವೇ ವ್ಯಕ್ತಿಗಳನ್ನು ಗುರುತಿಸುವ ಸಾಧನ. ಪೂರ್ತಿ ಹೆಸರು ಹೇಳಿ ಎಂದರೆ ನಮ್ಮ initials (ಮುಂದಕ್ಷರಗಳು) ಅನ್ನು ಸೇರಿಸಿ ಹೇಳುತ್ತೇವೆ. ಸಾಮಾನ್ಯವಾಗಿ ದಕ್ಷಿಣ ಭಾರತೀಯರಲ್ಲಿ 2 ಮುಂದಕ್ಷರಗಳನ್ನು ಕೊಡುತ್ತಾರೆ.

ಈಗ ನನ್ನ ಹೆಸರನ್ನೇ ತೆಗೆದುಕೊಂಡರೆ Raksha H . R. (Hassan  Ramesh ). ವ್ಯಕ್ತಿಯ ತಂದೆಯ ಹೆಸರಿನೊಂದಿಗೆ, ಊರಿನ ಹೆಸರು ಸೇರಿಸಿ 2 ಮುಂದಕ್ಷರಗಳು. ಕೆಲವರು, ಊರಿನ ಗೊಡವೆಯೇಕೆ ಎಂದು ತಂದೆ ತಾಯಿಯರ ಮೊದಲಕ್ಷರಗಳನ್ನು, initials ಆಗಿ ಕೊಡುವುದುಂಟು. ಕೆಲವರು ಬರೀ ತಂದೆ ಹೆಸರು ಮಾತ್ರ  ಸೇರಿಸುತ್ತಾರೆ. ದಕ್ಷಿಣ ಭಾರತೀಯರಲ್ಲಿ ಸ್ವಲ್ಪ ಉದ್ದುದ್ದ ಹೆಸರಿಡುವುದು ವಾಡಿಕೆ, ಇತ್ತೀಚೆಗಿಲ್ಲ, ಸ್ವಲ್ಪ ಹಿಂದಿನ ತಲೆಮಾರಿನವರಿಗೆ. ನಮ್ಮ ಅತ್ತೆ, ದೊಡ್ಡಪ್ಪಂದಿರ ಹೆಸರೆಲ್ಲ ತುಂಬಾ ಉದ್ದುದ್ದಕ್ಕಿದೆ. ನಮ್ಮ ದೊಡ್ಡ ದೊಡ್ಡಪ್ಪನ ಹೆಸರು ಲಕ್ಷ್ಮೀ ನರಸಿಂಹ ಸ್ವಾಮಿ ಎಂದು.  ಇನ್ನೊಬ್ಬ ದೊಡ್ಡಪ್ಪನ ಹೆಸರು ಲಕ್ಷ್ಮೀನಾರಾಯಣ ಎಂದು. ಮುಂದಕ್ಷರಗಳೂ ಜೊತೆಗೆ ಸೇರಿ ಇವರ ಹೆಸರು ಎಷ್ಟುದ್ದ ಆಗುತ್ತದೆ ಅಲ್ಲವೇ?!. ಇವರ ಹೆಸರನ್ನು ಮುಂದಕ್ಷರಗಳ ಸಹಿತ ವಿಸ್ತರಿಸಿ ಬರೆಯಲು (ಇಂಗ್ಲೀಷ್ ನಲ್ಲಿ) ಪಾಸ್‌ಪೋರ್ಟ್ನಲ್ಲಿರುವ ಜಾಗ ಸಾಲದೇ ಹೋಗುತ್ತದೆ. ಅದಕ್ಕೆ ಕಡೆಯವರಾದ ನಮ್ಮ ತಂದೆಗೆ ಅಕ್ಕಂದಿರೆಲ್ಲ ಸೇರಿ ಪುಟ್ಟದಾಗಿ ರಮೇಶ ಎಂದು ಹೆಸರಿಟ್ಟರಂತೆ. ನಮ್ಮ ಅಜ್ಜಿಗೆ ಒಮ್ಮೆ ಕೇಳಿದ್ದೆ, ಯಾಕೆ ನೀವು ಇಷ್ಟುದ್ದ ಹೆಸರಿಡ್ತೀರಾ? ಅಂತ.  ಬಡತನಲ್ಲೇ 9 ಮಕ್ಕಳನ್ನು ಬೆಳೆಸಿದ ನಮ್ಮಜ್ಜಿ ಹೇಳಿದರು,  ‘ದೇವರ ಹೆಸರಿಟ್ಟಿದ್ದರಿಂದಲೇ ದೇವರೇ ಮಕ್ಕಳನ್ನು ಕಾಪಾಡಿ ದಡ ಸೇರಿಸಿದ್ದಾನೆ!’ ಅಂತ. ನಿಮಗೆ ಈ ವಿಷಯ ಇನ್ನೂ ಮನವರಿಕೆ ಮಾಡಿಕೊಡಲು ಅನುಕೂಲವಾಗುವಂತೆ ಉದಾಹರಣೆ ಕೊಡುತ್ತೇನೆ. ಈ ದಕ್ಷಿಣ ಭಾರತದ ಪ್ರಸಿದ್ಧ ಕಲಾವಿದರ ಹೆಸರುಗಳನ್ನು ಗಮನಿಸಿದರೆ ಅರ್ಥವಾಗುತ್ತದೆ. N. T. R, A.N.R, MGR, SPB,  PBS ಹೀಗೆ ಹಲವಾರು ಉದಾಹರಣೆಗಳು ಇವೆ. ನಂದಮೂರಿ ತಾರಕ ರಾಮರಾವ್, ಅಕ್ಕಿ ನೇನಿ ನಾಗೇಶ್ವರ ರಾವ್,  ಮರುತೂರು ಗೋಪಾಲನ್  ರಾಮಚಂದ್ರನ್, ಶ್ರೀಪತಿ ಪಂಡಿತಾರಾಧ್ಯುಲ ಬಾಲಸುಬ್ರಹ್ಮಣ್ಯಂ, ಪ್ರತಿವಾದಿ ಭಯಂಕರ ಶ್ರೀನಿವಾಸ್ …ನಮ್ಮ ಕನ್ನಡ ಕಲಾವಿದರ ಹೆಸರೇನು ಕಮ್ಮಿ ಯಿಲ್ಲ. ಸಿಂಗಾನಲ್ಲೂರು ಪುಟ್ಟಸ್ವಾಮಯ್ಯ ಮುತ್ತುರಾಜ್ (ಡಾ. ರಾಜ್),  ಸಿಂಗಾನಲ್ಲೂರು ಮುತ್ತುರಾಜ್ ನಾಗರಾಜ ಶಿವ ಪುಟ್ಟಸ್ವಾಮಿ (ಗೊತ್ತಾಗಲಿಲ್ವೇ..?  ಶಿವರಾಜ್‌ಕುಮಾರ್!!)  ...ಅಬ್ಬಬ್ಬಾ!! ಇಂಗ್ಲಿಷ್ನಲ್ಲಿ ಇವರ ಹೆಸರುಗಳು ಇನ್ನೂ ಉದ್ದ.  ಈಗ ಹೇಳಿ ಪಾಸ್‌ಪೋರ್ಟ್ ನ ಇಲಾಖೆಯವರು ಇವರ ಹೆಸರುಗಳನ್ನು ಎಷ್ಟು ಕಷ್ಟಪಟ್ಟು ಭರ್ತಿ ಮಾಡಿದ್ದಾರೋ!

ನಮ್ಮ ಪೌರಾಣಿಕ ಪಾತ್ರಗಳಿಗೆ ಇದೇ ರೀತಿ initials ಇದ್ದಿದ್ದರೆ ಹೇಗಿರುತ್ತೆ..? ನೋಡೋಣ ಬನ್ನಿ. ರಾಮನ ಹೆಸರು initialsನೊಂದಿಗೆ A.D. ಶ್ರೀ ರಾಮಚಂದ್ರ (Ayodhya Dasharatha Shriramachandra), ಕೃಷ್ಣ ನಿಗೆ M. V. ಕೃಷ್ಣ (Mathura Vasudeva Krishna). ಪಾಂಡವರ initials H. P (Hastinaavathi Pandu) ಎಂದಾಗುತ್ತಿತ್ತು. ಕೌರವರದ್ದು H. D.ದುರ್ಯೋಧನ,          H.D.ದುಶ್ಯಾಸನ (Hastinaavathi Drutharashtra Duryodhana, ಇವರ initials ಗಮನಿಸಿ ನೀವು ಇನ್ಯಾರರನ್ನೋ ನೆನಪಿಸಿಕೊಂಡರೆ ಅದು ನನ್ನ ತಪ್ಪಲ್ಲ!) ಎಂದಾಗುತ್ತಿತ್ತು. ಕೆಲವರನ್ನು initials ಜೊತೆಗೆ ಕರೆಯಲು ಬಹಳ ಮಜಾ ಇರುತ್ತದೆ. ನನ್ನ ಸ್ನೇಹಿತೆಯೊಬ್ಬಳ initials K. D ಅಂತಿತ್ತು.  (ಕಡೂರು ದಯಾನಂದ್)  ಅವಳನ್ನ ನಾವೆಲ್ಲಾ  K. D ಅಂತ ರೇಗಿಸುತ್ತಿದ್ದೆವು. ಅವಳು ಹೇಳುವವರೆಗೂ ಎಲ್ಲರಿಗೂ ಹೇಳಿದಳು,  ಹಾಗೆ ಕರೆಯಬೇಡಿ ಎಂದು. ಜೋರು ಮಾಡಿದಳು, ಕೊನೆಗೆ ಗೋಗರೆದಳು. ಆದರೂ ಯಾರೂ K. D. ಅನ್ನುವುದನ್ನು ಮಾತ್ರ ನಿಲ್ಲಿಸಲಿಲ್ಲ.  ಹಾಗಾಗಿ ಅವಳು D. K. ಎಂದು initials ಬದಲಾಯಿಸಿಕೊಂಡಳು. ನನ್ನ ಇನ್ನೊಬ್ಬ ಗೆಳೆತಿಯ initials T. K.  ಅಂತ.  (ತರೀಕೆರೆ ಕುಮಾರಸ್ವಾಮಿ). ಅವಳ initials ಪ್ರಭಾವವೋ ಏನೋ,  ಅವಳು ಎಲ್ಲರನ್ನೂ ಟೀಕಿಸುತ್ತಲೇ ಇರುತ್ತಾಳೆ!!
M. Y. ಕವನ ಎನ್ನುವವಳನ್ನು ಎಲ್ಲಾ ಹುಡುಗರೂ My Kavana ಎಂದು ರೇಗಿಸುತ್ತಿದ್ದರು. ನಮ್ಮ ಶಿವಮೊಗ್ಗ ಜಿಲ್ಲೆಯ ಸಂಸದರಾದ ರಾಘವೇಂದ್ರ ಅವರ initials B. Y(ಬೂಕನಕೆರೆ ಯಡಿಯೂರಪ್ಪ) ಹಾಗಾಗಿ ಅವರಿಗೆ ನಾವು ಅವರ ಹೆಸರಿನ ಜೊತೆ ಯಾವಾಗಲೂ ಟಾಟಾ (By) ಹೇಳಬಹುದು. ಅನಂತಮೂರ್ತಿಯವರಿಗೆ ನೀವೇ ಅನಂತಮೂರ್ತಿ ಅಂತ ಜ್ಞಾಪಿಸುತ್ತಾ ಇರಬಹುದು. (You Are,  U. R. Ananthamurthy). ಮುಖ್ಯಮಂತ್ರಿ ಚಂದ್ರು ಖಾಯಂ ಮುಖ್ಯಮಂತ್ರಿ ಆದಂತೆ ಕೆಲವರು initials ದಯೆಯಿಂದ ಆರಾಮವಾಗಿ ಬೃಹತ್ ಹುದ್ದೆಗೆಳನ್ನು ಅಲಂಕರಿಸಿರುವ ಉದಾಹರಣೆಗಳಿವೆ. (S. P,  D.C ). ಕೆಲವರು ಪುಕ್ಕಟೆಯಾಗಿ ಸ್ನಾತಕೋತ್ತರ ಪದವಿಗಳನ್ನು ಪಡೆದ ನಿದರ್ಶನಗಳೂ ಇವೆ.(M. A,  M. S, M.D, C. A). ನನ್ನ initials displayನಲ್ಲಿ ನೋಡಿ ನಾನು HR departmentನವಳು ಎಂದೂ ಅನೇಕರು ಭಾವಿಸಿದ್ದಾರೆ.

initials ಬಳಸುವಾಗ ಕೆಲವೊಮ್ಮೆ ಜಾಗರೂಕರಾಗಿರದಿದ್ದರೆ ಅಪಾರ್ಥವಾಗಿ, ಅಭಾಸವಾಗುವ ಸಾಧ್ಯತೆಗಳಿವೆ. ಉದಾಹರಣೆಗೆ ಸತ್ಯಮೂರ್ತಿ ಎನ್ನುವವರ initial 'A' ಆಗಿದ್ದು ಅವರು A SATHYAMURTHY ಎಂದು ಈ ರೀತಿಯಾಗಿ ಬರೆದುಕೊಂಡರೆ ಅಸತ್ಯಮೂರ್ತಿ ಎಂದು ಅಪಾರ್ಥವಾಗುವುದಿಲ್ಲವೇ?  ಹಾಗೆಯೇ ರಾಮಾರಾವ್ ಎನ್ನುವ ಹೆಸರಿನವರ initial 'D' ಆಗಿದ್ದು ಅವರು D RAMA RAO  ಎಂದು ಬರೆದುಕೊಂಡರೆ ಡ್ರಾಮಾರಾವ್ ಎಂದು ಅಭಾಸವಾಗುತ್ತದೆ.
ಆದರೂ ಇವುಗಳನ್ನು ಬಿಟ್ಟು ನಮ್ಮ identity ಪೂರ್ಣವಾಗುವುದಿಲ್ಲ..ಅಲ್ವೇ… ಅಂದ ಹಾಗೆ ನಿಮ್ಮ initials ಏನು?  Comments ಮೂಲಕ ತಿಳಿಸಿ!!
                                              Signing off